Innovation Greenland

Kittaartagaq

Kittaartagaq taamaallaat inuussutissarsiutigalugu siunnersortimit ikiorneqarnermut atorneqarsinnaavoq.

inuussutissarsiutigalugu siunnersortimit ikiorneqarneq tassaasinnaavoq kukkunersiuisoq akuerisaq ingerlatassatut isumassarsiavit missingersuussiuunnissaanut ikiuussinnaasoq.

Eqqartuussissuserisuusinnaavortaaq piginneqatigiiffimmik imaluunniit aktiaatileqatigiiffimmilluunniit pilersitsinissamut ikiuussinnaasoq. Eqqartuussissuserisoq inatsisinut tunngasunik apeqqutinik allanik ikiorsinnaavaatittaaq.

Kiisalu siunnersortiusinnaavoq suliassaqarfimmi siunnersorneqarfigisariaqakkanni immikkut ilisimasalik, soorlu niuerfimmik misissueqqissaarneq il. il.

Paasissutissat

Aallarnisaasartut nunami inuussutissarsiummik aallartitserusuttut. Matumani pineqarput sullissinermi, takornarialerinermi, suliffeqarfissuarni (industri), niuernermi, akunnittarfilerinermi, IT-mi, misigisassarsiornerni allanilu  suliffeqarfiit aamma/imaluunniit susassaqartitsinerit. Taakku saniisigut siunertaq allanit tapiissutinit taperneqarsimassanngilaq, soorlu pisortanit tapiissutit ilinniartitaanermut, aalisarnermut, nunalerinermut kultureqarnermulluunniit tunngasut.

 

Qinnuteqartoq taperneqassaguni cvr normumik pilersitsisimasuussaaq. Matumanilu pineqartoq ingerlatseqatigiiffilluunniit Kalaallit Nunaanni najugaqarnissaa kiisalu Kalaallit Nunaanni akileraartussaatitaanissaa pingaaruteqarpoq.

 

Suliffeqarfik namminersortumit pigineqassaaq. Namminersortumit pigineqartoq ima paasineqassaaq, suliffeqarfik kommunimit Namminersorlutilluunniit Oqartussanit 49 %-imit annerusumik pigineqanngitsoq.

 

Tapiissutinik agguaanerni suliffeqarfiit unammillersinnaasut eqqumaffigineqartarput. Innovation Greenland suliniutinut unammeqatigiinnermut ajoqutaasinnaasunut tapiissuteqarneq ajorpoq. Tassa imaappoq illoqarfinni annerusuni qinnuteqaatit pitsaassusaasa annertunerunissaat piumasaqaataakujuttarput, suliniummi nutaaliornissamut piumasaqaatit annerullutik, niuerfiullu angissusaanik annertusaanissamut periarfissaqassalluni.

  •  

Kittaartagaq inuussutissarsiutigalugulu siunnersortimik ikiorneqarneq ilinnut aallarnisaasartutut suliffeqarfimmik aallartitsinissannut ilinniarsimasunik ikiorneqarnissamut pisariaqartitannut tamanut iluaqutaassapput.

Tapiissut annertussusaa  neqeroorutip tamarmiusup 80%-iatut annertutigaaq, taamaakkaluartoq siunnersorti illersugaasumik taaguutilik, soorlu kukkunersiuisoq eqqartuussissuserisorluunniit pineqarpat, annerpaamik 25.000 kr,-iussaaq. Kisianni assersuutigalugu ussassaarinissamut siunnersorti, tassa siunnersorti illersugaasumik taaguuteqanngitsoq pineqarpat, neqeroorutip tamarmiusup 50%-iatut annertutigisoq tapiissutigineqarsinnaavoq, taamaakkaluartoq annerpaamik 25.000 kr,-iussalluni.

Innovation Greenland ingerlatseqatigiiffeqataalu Greenland Venture aningaasaliissutissanut ataatsimiititaliaqarput, taakkulu qinnuteqaatit nassiunneqartut nalilersortarpaat isummerfigisarlugillu. Allaffissornissamut ilitsersuut naapertorlugu piumasaqaatillu maani allassimasut malinneqarnersut apeqqutaatillugit aalajangiisoqartassaq.

Qinnuteqaatinni uku allagaatit ilanngutissavatit:

  • Ingerlatsinissamut pilersaarut
  • Ukiumut naatsorsuutit ingerlatsinermulluunniit missingersuutit (Aps A/S-imilluunnit pilersitsinissamut atatillugu)
  • Pilersuisumit neqeroorut

Kittaartakkamut qinnuteqaammik nassiussinermi ingerlatsinissamut pilersaarut suliarisimassavat, tassani kittaartagaq sumut atorniarnerit nassuiarneqassaaq kiisalu suliffeqarfivit siunissami qanoq ittuunissaa nassuiarneqassalluni. Suliffeqarfivillu ingerlatseqatigiiffinngortinnissaa siunertaralugu kittaartagaq qinnuteqaruit ukiumut nalunaarusiap ingerlatsinermulluunnit missingersuut. Matumanittaaq pingaaruteqarpoq siunnersortimit kittaartagaq atuiffiginiakkannit neqeroorummik peqarnissaq, taannami qinnuteqaatinnut ilaasussaammat.

Qinnuteqaasiunnginninni siunnersuutigaarput kommunerisanni inuussutissarsiornermut siunnersortimik oqaloqateqaqqaarnissat, taakku ikiorsinnaassammatit.

Qinnuteqaativit tiguneranit qaammat ataaseq tikillugu sivisutigisumik suliarineqassangatinneqarpoq.

Tapiissutisissagaanni ilanngaatissanut naatsorsuutit nalunaarusiallu suliarineqareersimassapput. Tamanna qinnuteqarnissamut iserfissaq aqqutigalugu pissaaq. Ilanngaatissanut naatsorsuiniaraanni pisinermi allagartat akiliisimanermullu uppernarsaatit, soorlu kontup assilinera dankortilluunniit allagartaa, uploaderneqassapput. Massuma kingorna aningaasartuutaasimasut 50%-ii 80%-iiluunniit akilerneqassapput, tapiissutip akuerisap annertussusaa apeqqutaalluni.

Scroll to Top

0-10-mut naliliissaguit, qanoq ilimanartigiva innovation greenland innersuutiginissaa ikinngutinnut, suleqatinnuluunniit?

Annertunngilaq Innersuuppara assut

Pingaarnertut nalilersuininnut peqqutaa?