Innovation Greenland

Taperneqarnissamut qinnuteqariaaseq nutaaq

Innovation Greenland marsip 9-iani qinnuteqariaatsimik nutaamik pilersitsivoq, taamaalillutik inuussutissarsiuteqartut aallarnisaasullu qinnuteqaatip nassiunneraniit suliarineranut malinnaasinnaanerullutik.

 

Tamatuma saniatigut atuisup (inuussutissarsiuteqartup aallarnisaasullu) suliaq qanoq ingerlanersoq takusinnaanerussavaat, atuisup sullissisullu akornanni allakkat maanna ataatsimut katersorneqarlutik.

 

Sivisuumik ajornartorsiutaasarpoq qinnuteqartumik attaveqarnerput oqarasuaatikkut mailikkullu pisarluni, tamannalu piffissaajaataasarluni uppernarsaatit tamarmik katersorneqartussaammata. Qinnuteqariaaseq atorlugu qinnuteqaatit nassiunnerat tigunerilu ajornannginnerulissaaq, qarasaasiakkoortumik attaveqatigiilluni allakkianillu paarlaateqatigiilluni.

 

Atuisumut taperneqartumut annertuumik iluaqutaassaaq, qinnuteqariaaseq aamma oqarasuaat angallattakkakkut atorneqarsinnaassammat qarasaasiatigoornerup saniatigut.

Naatsorsuutigaarput tamanna iluarnerussasoq, allakkianik nassiussinermi, tapiissutit akuerineqarsimasut akilerneqarnissaat pisariaqartikkaanni.”

–          Gorm Geisler Vold, Innovation Greenland

 

Pilersitsinikkut aamma qinnuteqariaaseq aalajangersarneqassaaq

Qinnuteqarfissaq

Pilersitsinermi aamma sullisseriaaseq nalilersorneqarsimavoq, maanna ukiumut ulluni aalajangersimasuni qinnuteqarfissanik aalajangersaasoqarluni.

Qinnuteqarfissaq tulleq tassaassaaq marsip 21-iani 2022.

 

Qinnuteqaat

Siusinnerusukkut qinnuteqartoq aalajangersimasunik qinnuteqartarpoq, tamanna maannakkut allanngortinneqarpoq. Maannakkut qinnuteqartut ataasiakkaat pisariaqartitsinerat sullissisuniit nalilersorneqartassaaq, tassanilu aaliangerneqartassaaq qinnuteqaat sorleq qinnuteqartup qinnutigissaneraa.

 

Tapiissutit qinnuteqartunut ataasiakkaanut naleqqussarnissaannut eqaannerulissaagut, siusinnerusukkut tapiissutit aalajangersarneqarsimallutik, maannakkullu qinnuteqariaatsimi nutaami tapiissutit naleqqussarsinnaallutigit qinnuteqartup allagaani missingersuutit takusinnaasavut malillugit.”

–          Gorm Geisler Vold, Innovation Greenland

 

Innivation Greenlandimi nuannaarutigalugu marsip 9-iani qinnuteqariaaseq nutaaq atuutilissasoq nalunaarutigisinnaavarput.

 

Qinnuteqaat nassiutinnagu inuussutissarsiornermi siunnersorti oqaloqatigineqassaaq, taassuma allakkiat uppernarsaatit piareersassuai qinnuteqartoq qinnuteqarsinnaasutut akuerineqannginnerani.

 

Uppernarsaatit soorlu makkuusinnaapput:

 

–          Niuernissamut pilersaarut

–          Aallartinnermi missingersuutit

–          Ingerlatsinermi missingersuutit

–          Aningaaserivimmit oqaaseqaat

–          Pilersuisussamiit neqeroorut

 

Niuernissamut pilersaarusiorsimassaatit tassanilu niuernissamut isumassarsiat niuerninnilu siunissamut takorluukkatit nassuiarlugit. Aallartinnermi missingersuusiortoqassaaq niuernissamut isumassarsiavit aallartinnerani tamakkiisumik aningaasalerneqarnissamik pisariaqartitsinerit ersarissarlugu, kiisalu ingerlatsinermi missingersuusiorlutit, isumassarsiavit sinneqartoorfiusinnaaneranik takutitsisunik. Aningaaserivimmiit oqaaseqaatit pisariaqartippavut imaluunniit arlaatigut nammineq aningaasaliisinnaanissamut uppernarsaat, tassani takussutissaassaaq aningaasaliinissamik pisariaqartitsinerup tamakkiisup sinneri akilerneqarsinnaaneri. Aamma pilersuisussanit arlaatigut uppernarsaatit pisariaqartippavut. Sapinngisamik neqeroorutit Kalaallit Nunaanni pilersuisuniissapput.

Siuliani allakkianut maleruagassat nittartakkatsinni takuneqarsinnaapput

 

Iværksætterguide – Innovation Greenland

 

Qinnuteqariaatsimut nutaamut atatillugu Innovation Greenlandimi aamma qinnuteqarfissat toqqarneqartut qaammatit aallartinnerini pisassapput, taamaalilluni qinnuteqarfissaq tulleq tassaalluni marsip 21-iani – kingornalu qaammap aallaqqaataani pisassaaq.

Leave a Comment

Your email address will not be published.

Scroll to Top