Innovation Greenland

Nunami namminermi inuussutissarsiutinik siuarsaanermut attaveqaqatigiit pilersinneqarput

Nunap immikkoortuini assigiinngitsuni nunamilu namminermi inuussutissarsiornermik ineriartortitsisut akornanni suleqatigiinnerup nukittorsarneqarnissaa pillugu suliaqarluni isumasioqatigiinnermut Innovation Greenland sapaatip akunnerata matuma aallartinnerani aaqqissuussisuuvoq.

’Inuussutissarsiutinik siuarsaanermut attave qaqatigiit’ inuussutissarsiornermut siunnersuisoqatigiit annertunerusumik pitsaanerusumillu inuussutissarsiortunik sullissisinnaanissaannut, taamaalillutillu nunatsinni aallarnisaasunut suliffeqarfinnullu aningaasarsiortitsisinnaanerulernissaannut, ikiuuttussat, pilersinneqarnerannik ilaatigut suliaqarluni isumasioqatigiissitsineq inerneqarpoq.

 

”Nunap immikkoortuini inuussutissarsiornermi siunnersuisoqatigiit suleqatigalugit aatsaat pitsaanerpaamik ingerlasinnaavugut, tassami taakkua suleqatiginerisigut sullississutigut nunatsinni sumiiffinnut tamaginnut annguttarput.” Oqarpoq Christian Wennecke, Innovation Greenlandimut pisortaq, nangillunilu: ”Paarlattuanik aallarnisaasut assigiissaartumik aningaasartuutitigullu sunniuteqarluartumik sullissinissatsinnut periarfissaqarpugut, aammalu 2022-mi ingerlatassanik pilersaarusiornitsinni nunap immikkoortuini aningaasarsiornerulernerup taakkunani pilersissinnaasatta takuneqarsinnaanissaa aalajangiisuulluinnartarpoq.”

 

Nunap immikkoortuini inuussutissarsiornermi siunnersuisoqatigiit tamarmik kommunimiipput, imaluunniit kommunimut kiffartuussinissamut isumaqatigiissuteqarlutik. Taakkua najukkani sumiiffimminni inuussutissarsiornermut siunnerfilimmik ineriartortitsinermik suliaqarnertik, aammalu inuussutissarsiortunut, ilinniartitaanermi periaatsimut kommunimilu allaffissornermut qanittuaqqamik attaveqarnertik ataatsimoorutigaat.

 

”Kalaallit Nunaata kujataani annertoorujussuarmik allanngortitsisinnaanissamut periarfissaqarnerput takusinnaavarput” oqarpoq Allan Chemnitz, Innovation South Greenlandimut pisortaq nangillunilu: ”Innovation Greenlandip aammalu nunap immikkoortuini inuussutissarsiornermi siunnersuisoqatigiit allat suleqatigineranni Kalaallit Nunaanni siuariartortitsinissamut piujuartitsinermullu takorluukkatta piviusunngortinnissaannut periarfissagut pitsaanerulerput.”

 

Pissusiviusut – Kalaallit Nunaanni inuussutissarsiutinik siuarsaanerup ilusiligaanera

 

Avannaata kommuniani aamma Kommuneqarfik Sermersuumi inuussutissarsiutinut siunnersuisoqatigiit kommunip ingerlatsivianut ilaatinneqarput, taakkua taagorneqarput Avannaata Inuussutissarsiornera aamma Sermersooq Business.

 

Qeqqata kommunianiipput nunatsinni inuussutissarsiornermi siunnersuisoqatigiit pisoqaanersaat, ullumikkut taagorneqartut Arctic Circle Business. Taakkunani immikkuullarissutaavoq peqatigiiffiunera, kommunimi suliffeqarfiit akornanni akiliillutik ilaasortat amerlasoorpassuullutik.

 

Innovation South Greenland A/S aamma Qeqertalik Business Council A/S ingerlatseqatigiiffittut aaqqissuussaapput, kommuninit inissisimaffigisaminnit pigineqarlutik, kisianni kommunimi inuussutissarsiortut ingerlalluartut arlallit siulersuisuiniillutik.

 

Innovation Greenland A/S Namminersorlutik Oqartussanit suliffissuaq Greenland Holding aqqutigalugu pigineqarpoq, aamma tassaniilluni aningaasaliisarnermut ingerlatseqatigiiffik Greenland Venture A/S.

 

 

 

”Innovation Greenlandip aallarnisarnitsinni siusissukkut tikeraarmatigut uagutsinnut iluaqutaasorujussuusimavoq, sulinitta aaqqissuussaasumik ingerlanissaanut tamanna iluaqutaavoq, aammalu tapersersuerusuttoqartoq ilisimallugu qujanaannarpoq.” oqarpoq Gerth P. Olsen, Qeqertalik Business Council-imi pisortaq, nangillunilu: ”Qanittumi suliffeqarfimmi ingerlatsinermi pikkorissaanernik Innovation Greenland peqatigalugu arlalinnik ingerlataqarpugut, tamannalu misilittakkanik inerisaanissamut periaasiusimavoq uagutsinnut pitsaasoq.”

 

Suleqatigiinneq pillugu isumasioqatigiinneq 2021-p ingerlanerani nunap immikkoortuini tamaginni aaqqissuunneqarsimasoq, kiisalu ingerlaavartumik oqaloqatigiilluartarneq aammalu aallarnisaasunik pikkorissaanernik ingerlatsinissaq pillugu suleqatigiilluarneq, suliaqarluni isumasioqatigiinnermi inerisaqqinneqarput. Siunissami ataatsimoorluni suliniutissaq, attaveqaqatigiit aningaasarsiornerulersitsisarnerup ingerlaannarnissaa qulakkeerniarlugu sulissutiginiagaat, tassaavoq – Innovation Greenland-imit ingerlanneqartumik – inuussutissarsiornerup ineriartortinneqarneranut digitalimik ataatsimoorfissamik ataatsimik arlalinnilluunniit pilersitsinissaq.

 

”Innovation Greenland sakkussanik, internetsikkut pikkorissarnernik, videulianik ilitsersuiffiusunik, aammalu paasissutissanik nalunaarsukkanik misissueqqissaarnernillu assigiinngitsunik imalimmik digitalimik ataatsimoorfissamik pilersitsigaangat, tamanna kommunitsinni inuussutissarsiornermi periusissatigut sulinitta aallunnissaanut pitsaanerpaamik periarfissaqalersitsisarpoq.” oqarpoq Jesper Schrøder, Arctic Circle Business-imi pisortaq. Tamanna uagutsinnut iluaqutaasorujussuussaaq, sakkussanik najoqqutassanillu tunngavissippatigut, taamaalilluta isumalluutivut annikitsuinnaasut sapinngisamik pitsaanerpaamik atorsinnaassavagut, tamanna aamma sunniuteqarluarnerusarpoq, tassami uagut inuussutissarsiornermi siunnersuisoqatigiit nunarput tamakkerlugu pisariaqartitatsinnik taakkua tapersersorsinnaammatigut.”

 

Maannamut attaveqaqatigiit ukiumut pingasoriarlutik ataatsimiittarnissaq isumaqatigiissutigaat, taakkunani ataaseq naapilluni ataatsimiinnerussaaq, nunap immikkoortui tulleriiaarlutik paarlakaatissallutik, ataatsimiinnernut siunertaavoq suliniuteqarnerit pitsaanerusumik ataqatigiissaarneqarnissaat aammalu unammilligassamik periarfissamillu ilisimanerulernissaat.

 

 

Leave a Comment

Your email address will not be published.

Scroll to Top